أوغاد الموساد و ابوالعربي زينة الشباب!!؟

ابو العربي في صباح يوم السبت ( أول يوم دراسه )
ابو العربي بعد اجازة العيد صحي بدري مش شايف قدامه علشان يستعد ويروح الكليه . دخل الصبح ياخد الشاور المتين عشان يصحصح . وكتر من الشاور جل عشان ينتعش ؛ وعمال يغني بصوت مزعج لغاية لما صحا الجيران . وفجاة وبدون مقدمات الميه اتقطعت علي ابو العربي . والشاور في عنيه .. وابو العربي بقي في موقف لا يحسد عليه. ويزعق وينادي يعالم ياللي فوق أقفلو الميه .. ولا حياة لمن تنادي ..
قرر ابو العربي ينشف نفسه كده وخلاص .. خرج ابو العربي من الحمام اخيرا .... وراح ناطط في بنطلونه وضارب التي شيرت والكاب واخد اجندته وحط برفانه التركيب ( المضروب يعني ) ونزل عشان يروح كليته .واتلقي المفاجاه الكبيره الشارع كله غرقان ميه والطريق مسدود بسبب انفجار ماسورة الميه !!!!!
ابو العربي قائلا ً : يادي اليوم اللي باين من اوله ( الظروف النهارده كلها ضدي ليه ؟ ) دي مؤامره عشان مروحش الكليه ( أكيد الموساد هو اللي ورا الموضوع ) – أصله متاثر شويه بروايات رجل المستحيل ) والله لافضحهم واعمل جروب علي الفيس بوك واسميه ( أوغاد الموساد و ابوالعربي زينة الشباب ) وقعد يتخيل نفسه وهو بيقلد دور "رأفت الهجان "
وعاش في الأوهام ومفاقش غير علي عربية معديه بسرعه وراحت مطرطشه علي هدومه ..
أبو العربي كان هيفقد أعصابه بس تذكر قول النبي ص ( لا تغضب ) فهدي تاني وتاكدت عنده فكرة الموساد وان اللي راكب العربيه اكيد عميل اسرائيلي متخفي وراكب عربيته الهيونداي الفرنا أجرة بورسعيد.واستغفر ربنا وقعد يحاول يعدي وربنا اكرمه في الآخر وركب تاكسي وبرضو هيونداي مما جعل الشك يتسلل اليه مرة تانيه ..
السوائق :صائحا علي فين ياستاذ
أبو العربي : كلية تجاره ياسطي
السواق : الأجره 3 جنيه
أبو العربي : هما 2 جنيه مفيش غيرهم
السواق : خلاص اركب ميكروباص يا شاطر ومتزهقناش ياعم
أبو العربي : انت مالك ياعم .. انت شاكلك كده عميل للموساد
السواق : اناعميل يا..........
ابو العربي : وعميل CIA "المخابرات المركزيه الأمريكيه "
السواق : أنت ملبوس ياجدع انت موساد ايه و CIA ايه انت شاكلك شارب حاجه انزل بدل معرفكش شغلك
أبو العربي : خائفا خلاص ياعم ربنا يكفينا شرك 3 جنيه وامرنا لله

واخيرا وصل ابو العربي الكليه ومتلقاش فيها حد ..سال العسكري هو مفيش حد ليه النهارد؟؟؟
أجابه العسكري : النهارده الجمعه يابو العربي صحي النوم
أبو العربي :ازاي النهارده الجمعه انا شايفها في النتيجه السبت .. مفيش غير الموساد هو اللي ورا الموضوع ده ومسلسل الأوهام أشتغل ( وجمعه الشوال – ورأفت الهجان )

وابو العربي بدأ يكلم نفسه... وبعدين ابو العربي اللي بيحصلي ده النهارده ..اليوم ده كله مشاكل كده ليه هو انا عملت ايه غلط يارب ....واخيرا...... تذكر ابو العربي انه مصلاش الفجر النهارده وان الموضع ملوش دعه بالموساد ولا حاجه فقرر ابو العربي ميفوتش فجر تاني :

ومع السلامه ومغامره جديده من مغامرات أبو العربي

مع تحيات أبو العربي البورسعيدي